الى طاغوت مر من هنا

Posté le 8 février 2011

الحق الحق لا ما فما شي الشعب فد و كسر الحصار 

طق طق  الخابية ما تقول طق الًا ما رأسها تفتق 

طق طق  الشعب من الخوف من الغبينة قلبه تشق 

 رأس التاتا من دم المظاليم كبر و الناس تعيش في القبر الغولة من شقى الشعب عملت بنوك و شركات 

الشعب مات بالشر ذاق المرار و الذل سنوات  اتفرج المقهور اش يعمل ؟ يحرق روحو بالدمار بالغل 

بالصراحة يا سي الغول حياتنا ولات قيمتها فول  بكرامتنا مسحتو الشارع و الدستور 

بشقانا : بفلوسنا ركبتو المرسيدس و البابور  بالدستور دورتو الدوالب و من القالب خرج الفساد 

بالمعروف و الجميل كتفتوو الملايين لا قلتو احشمتو و لا من السرقة شبعتو 

لا قلتو ظلمتوا و لا من دعى الشر فهمتو لا قانون يردع و لا قاضي يشفع 

لا ما نسيناش كيفاش جيتونا البارح كنت تقول انا التغيير 

فين فين ..هالتغيير ولينا من غير مصير ضايعين ..مشردين في بلاد اجدادنا 

جيعانين ..بطالة كاسدين بالبوليتيك و الاستراتيجيات 

بالتوجيهات و الاشادات بالبرقيات و التهاني 

و تحبوني نسكت و نبتسم ابتسم انها تونس 

ماهي البسمة ولاتنا سمٌ يا سي الزين 

جماعتك عصابة سراق رشاوي و محسوبية افلوسنا ويين يا ابو تونس و الجمهورية 

لشكون القروض و القوانين التشجيعية لشكون الاعفاءات الجبائية 

لشكون الاقرارات الزجرية الوزارات والأدارات و المطارات و الديوانة و البلديات 

تخدم للعائلة الملكية جاري عندو سنين يستنى في رخصة البلدية 

قيس اكلا ارض الدولة و القابسية فين الاجرائات الردعية 

قصرك يا زين مبني على ملك جدي انتزعتوه للمصلحة العامة 

 و اهديتو للعائلة الطرابلسية و لاهية وجوه و كل واحد و اسهاماتو 

في دفع عجلة السرقة الاقتصادية اقهرتونا ..فلستونا..ضيعتونا 

جهار بهار اقلبتو عيشتنا مرار واليوم نحاسبوكم 

باسم الشعب باسم النظام و التونسي ولد النظام 

على بلادو قلبو يشعل نار 

 سياساتكم نار..يا  أشرار .تطلع تهبط مع الدولار .. 

سمعنا … الرئاسة مدى الحياة ما فماش بيان السابع…طلع..كلام نشاف 

 كلام كليناكس موش قرار..طلعنا بلاش وعي و لا كيفاش .. لصقت الالقاب بالكراسي ..اش يخرج الجزار 

سايس… تحل موضوع  عائلة الاستعمار  الارزاق اللي تتسرقت جهار بهار 

 سيدي فدينا من السكات ..بابا تاتا مات 

 و الحق اليوم بالضرب؟بالصباط ؟ اش يهم اذا كنا ولاد الشارع ..بلاش احزاب …بلا انتماءات 

اش يهم اذا كنا الكل في الشارع ..المهم أحرار بوزيد قام 

تحرق عهد الترهدين تحرق عهد اللون الواحد و الكاش كول 

 ما عادش فما سكات   سيبني للشارع نخرج 

اليوم صوت الشعب نطق ماعادش راضيين بالفتفات سيدي.. التاتا مات …مات ..شيخات؟ 

يا جماعة بابور المسايسة و الصبرغرق … بقبق من كلمة هات هات 

يا عصابة الدمار..قتلتونا بالكاباس و بالمخططات هاني ما زلت بطال 

كليتو الهكتارات ..غزيتونا في البقرات الصابة في السيلونات 

الحليب من دليس  القمح في واد مجرداء عريس 

الماء من جوابي زغوان الناس خرجتوهم من املاكهم من ديارهم 

من عقولهم ..في قلوبهم بركان نار العمدة ..البلدية ..الوالي ..الوزير..اللِلاء 

وسائل الاجبار ناس توقع بحبر القوة و الاجبار 

يا شلة الفساد..بلعتونا في ربع قرن استعمار؟  سرقة بالقانون ..بالمليار 

النواب صبابة ماء عـلى الايدين 

يا اولاد الاربعين حرامي ..منين جاتكم الثروة من جاتكم كنوزالاستثمار؟؟ ناس تاكل الكفيار و ناس ما هيش لاقيا حق الكار؟؟. 

 

Il n'y a actuellement pas de commentaire pour cet article.

Laisser un commentaire